Rutahizamu wa Bayern Munich, Harry Kane, ashobora kumara igihe kitari gito hanze y’ikibuga nyuma yo kugira imvune yo mu kagombambari, bikaba bishobora gutuma iyi kipe yo mu Budage imubura mu mikino itandukanye.

Ku wa Gatanu tariki ya 20 Ugushyingo 2026, Kane yagize iyi mvune ubwo Bayern Munich yakinaga na FC Köln mu mukino wa shampiyona y’u Budage, Bundesliga, warangiye amakipe yombi anganya igitego 1-1. Yavunikiye ku munota wa 20 nyuma yo kugongana na myugariro wa Köln, Joël Schmied, ubwo yashakaga kugera ku mupira wari utewe na Michael Olise. 

Ibizamini byakozwe n’abaganga ba Bayern Munich byagaragaje ko Kane yacitse igice cy’umutsi uhuza amagufa yo mu kagombambari k’akaguru k’ibumoso (syndesmosis ligament tear). Umuyobozi ushinzwe ibikorwa bya siporo muri Bayern, Max Eberl, yavuze ko abaganga bakiri kuganira niba akeneye kubagwa. 

Nubwo Bayern Munich itatangaje igihe nyacyo azamara adakina, amakuru aturuka mu Budage agaragaza ko ashobora kumara amezi agera kuri atatu hanze y’ikibuga, bikaba byatuma atagaruka mbere ya Gashyantare 2027.

Iyi mvune ni igihombo gikomeye kuri Bayern Munich, kuko Kane ari umwe mu bakinnyi b’ingenzi mu busatirizi bwayo. Ikindi kandi, iyi kipe ifite abandi bakinnyi basanzwe bafite ibibazo by’imvune, barimo Michael Olise na we wavunikiye muri uwo mukino, nubwo ibizamini byagaragaje ko afite ikibazo cyoroheje cyo gukomereka ku kirenge.